Tagebuch

  Victory!

Do - 19/Jan/2006  

Aso... entli hanis au na gschafft, in Usgang z'ga mit mine Schuelkolleginne und Schuelkollege! Ich bi aber natürli schnell hei nach de Schuel und ha mini Ufzgi gmacht... hehe, nei würkli! Ihr kenned mich ja... min Hostvater isch sogar so nett gsi und het mich i d'Schuel gfahre, woni mich mit de anderne troffe han. Vo det us simmer de mit em Taxi zunere Kollegin hei, wo imene Sharehouse wont... das Hus isch eifach genial! Es isch zweistöckig, het e Chuchi, grümigs Wohnzimmer und denn na e Terrasse! Det simmer denn au bits gsesse, hend gschwetzt und so...

Tja, irgendwenn hemmer eus denn ma ufgmacht in Club "Victory". De Club het verschiedni Rüm. Natürli hets en Dancefloor und Bar gah, aber au na en Rum mit Billiardtisch und eme Riisebildschirm, wod Tennismatch (Australian Open) hesch chöne aluege. Wo den de Club zuegmacht het, simmer uf d'Strass gstellt worde und vome Security Man möglichst wiit weg vom Clubigang gschobe worde... hehe, ja, denn bini mit de Kollegin im Taxi hei... ha ca. drüü Stunde Schlaf gfunde und bi naher top fit i d'Schuel! Echt! Bin selber erstuunt gsi...

zurück >>